'N PA VIR SATERDAG deur Christo Davids (Bespreking 1)

Ons vind hier ‘n verhaal vol innerlike konflik. Dié konflik spoel ook oor na eksterne gebeure in die verhaal. Tino bevind hom in ‘n situasie waar hy begin leuens vertel om sy menswaardigheid te behou. Hierdie situasie ruk uiteindelik heeltemal handuit wanneer Tino besef dat hy só vasgevang is in ‘n web van leuens dat hy nie daaruit kan ontsnap nie.

Tino en sy ma woon saam onder dieselfde dak, maar daar is baie min kontak tussen hulle. Daar is geen aanduiding dat daar ander kinders is nie en Tino het sy pa nog nooit gesien nie. Hy het ‘n behoefte aan ‘n teenwoordige pa wat sy rugbywedstryde kan bywoon. Wanneer hy aan die begin van die verhaal sit en dagdroom, hoor hy in sy verbeelding hoe iemand in die skare skree: “Dis my laaitie daardie!”

Tino se ma is ‘n verpleegster en sy werk nagdiens. Haar beroep en die moeilike ure wat sy werk, maak haar ongeduldig teenoor Tino wanneer hy oor sy pa uitvra. Dis duidelik dat dit vir haar ‘n teer punt is, want Tino sien soms hoe sy ma in haar kamer na hul troufoto’s kyk en haarself aan die slaap huil. Sy weier om met Tino oor sy pa te praat en hy kan geen inligting uit haar kry nie. Wanneer hy met haar oor sy pa wil praat, ontwyk sy hom, of sy onderbreek hom en gee voor dat sy laat vir werk gaan wees. Hy besef dat hy baie vinnig ‘n plan sal moet maak om voor Saterdag se wedstryd ‘n pa in die hande te kry. Hy raak so obsessief daaroor dat hy selfs snags daarvan droom.

Martin verpes Tino wanneer hy oor sy pa begin uitvra. Dit is hier waar Tino begin om leuens oor sy pa te vertel. Hy vertel dat sy pa ‘n suksesvolle sakeman is wat in Holland woon en net twee keer per jaar Suid-Afrika toe kom om sy gesin te besoek. Die leuens ruk later heeltemal handuit omdat Martin nie wil ophou om Tino te treiter nie.