SELFPORTRET – Lukas Malan

REËLVERKLARINGS

Reël 1: Die spreker sê dat Rembrandt van Rijn hierdie genre (om selfportrette te skilder) "vervolmaak" het, met ander woorde hy het dit perfek reggekry om selfportrette te skilder. Hy het die selfportrette wat hy geskilder het beter op ʼn doek vasgevang as enige ander skilder wat ook selfportrette geskilder het.
Reël 2: Hier word Rembrandt se fisiese woonadres gegee. Hy het in die Joodse gedeelte van Breestraat gewoon.
Reël 3: Hy het dikwels portrette van die ryk mense geskilder. Op hierdie skilderye het hy hulle telkens gevlei, met ander woorde hy het hulle baie beter/mooier laat lyk as wat hulle werklik was. Dit was ook net die rykes wat kon bekostig om skilderye van hulself te laat skilder.
Reël 4: Net soos wat hy goeie skilderye van die rykes kon maak, het hy dit reggekry om homself ook uiters goed te kon skilder en baie mooier te laat lyk. Die kennis wat hy opgedoen het deur die skilder van ander mense, het hy gebruik wanneer hy selfportrette geskilder het.
Reël 5–6: Hy het homself dikwels soos volg geskilder: sy manier van staan en postuur was baie trots; ʼn jongman/edelman wat uiters deftig geklee is en "staan en pronk". Hy lyk dus baie selfvoldaan.
Reël 7: Hy skilder homself as ʼn man met baie mooi gelaatstrekke en dit lyk asof hy dink hy is beter as ander mense ("hooghartig"). Die feit dat die mense hom "begluur" impliseer dat hulle jaloers is op hom – dalk omdat hy so swierig en aantreklik lyk.
Reël 8: Die klere wat hy op sy selfportrette dra blink, waarskynlik as gevolg van die olieverf, maar ook omdat hy dit blinkerig, sy-agtig en duur laat voorkom deur sy uitstekende skildertegniek. "Skilderagtig" verwys hier na die ongelooflike skoonheid. Hy lyk ook baie jonk op die selfportrette.
Reël 9–10: Nou sê die spreker vir die leser om enige van die menigte selfportrette wat Rembrandt van Rijn geskilder het as voorbeeld te neem en dit met sy laaste twee selfportrette te vergelyk.
Reël 11: Dit wil voorkom asof van Rijn in hierdie laaste twee selfportrette werklik eerlik was en homself as ʼn hartseer ou man uitgebeeld het wat lyk asof hy enige oomblik kan begin huil.
Reël 12: "Daar is niks" kan impliseer dat daar geen ooreenkoms is nie, niks om die twee laaste selfportrette mee te vergelyk nie. Dit kan ook impliseer dat daar niks meer van die swierigheid en jeug van die oorspronklike selfportrette oor is nie. Daar is ook geen emosie nie, maar ʼn mens kan wel "verdigte verdriet" sien, met ander woorde hartseer wat hy probeer wegsteek. Sy oë het ʼn hartseer uitdrukking.
Reël 13: Die spreker sê nou vir die leser om sy/haar eie foto-albums te neem en deur te kyk. Die leser moet veral na sy/haar gesig en liggaam kyk.
Reël 14: Is die foto's van jouself net so ʼn goeie weergawe van jou as wat Rembrandt se selfportrette van hom was? Lyk jy ook beter op jou foto's as in die werklikheid, met ander woorde "in die Rembrandt-styl"? Dalk vra die spreker of jy ook agteruitgang kan sien, of dalk kan raaksien toe jy uiteindelik besef het wat die realiteit van jou voorkoms is.