LIEN SE LANKSTAANSKOENE OPSOMMINGS HOOFSTUK 4-6

INHOUDSOPGAWE HOOFSTUK 4-6

Opsomming Hoofstuk 4

Opsomming Hoofstuk 5

Opsomming Hoofstuk 6

LIEN SE LANKSTAANSKOENE OPSOMMINGS HOOFSTUK 4–6

LIEN SE LANKSTAANSKOENE OPSOMMINGS HOOFSTUK 4–6

LIEN SE LANKSTAANSKOENE OPSOMMINGS HOOFSTUK 4–6

LIEN SE LANKSTAANSKOENE OPSOMMINGS HOOFSTUK 4

DIE MEESTERSTUK

Inhoud

Juffrou Breytenbach, Lien se Afrikaans-onderwyseres, praat oor die nuwe toneelstuk wat die matrieks gaan opvoer. Sy is baie entoesiasties daaroor, maar die klas sien dit net as 'n ideale geleentheid om uit hul mondelingwerk uit te kom. Juffrou Breytenbach stem uiteindelik in om 'n paar bladsye voor te lees. Die stuk is gebaseer op die Amerikaanse film The Breakfast Club, maar niemand in die klas het ooit die fliek gesien nie. Die stuk handel oor 'n groep skoolkinders se vrese, probleme en drome.

Lien stel glad nie belang in die toneelstuk nie; sy verpes enigiets wat Amerikaans is. Sy wonder wat die middag by Malie Dry se koffiekroeg vir haar inhou en gee glad nie aandag aan juffrou Breytenbach nie. Die onderwyseres stel voor dat Lien die klas verlaat as sy nie belangstel nie. Wanneer sy begin voorlees, raak die kinders stil en hulle begin aandagtig luister, selfs Lien; hulle is geboei deur die teks en is spyt as die periode verby is. Juffrou Breytenbach belowe om die res van die stuk daardie Vrydag klaar te lees.

As Lien by die deur wil uitstap, vra juffrou Breytenbach dat sy 'n rukkie moet agterbly. Lien is ongemaklik en weet nie waaroor dit gaan nie. Juffrou Breytenbach wil weet hoekom Lien kwaad vir almal is. Volgens haar haal Lien haar onderdrukte woede op almal om haar uit. Sy is onwillig om saam te werk en wil nie nuwe vriende maak nie. Sy doen net dinge as sy gedwing word om dit te doen. Lien het baie potensiaal as leerling, maar sy handhaaf 'n baie lae profiel. Juffrou Breytenbach stel voor dat Lien met iemand oor haar probleme moet gesels – sy is self ook bereid om te help waar sy kan. Lien kyk juffrou Breytenbach sprakeloos aan.

Juffrou Breytenbach versoek Lien om vir een van die rolle in die toneelstuk te kom lees, maar Lien sê dat sy nie van Amerikaners se arrogante houding hou nie. Volgens juffrou Breytenbach is die stuk tyd- en plekloos en dit handel oor tieners, nie spesifiek oor Amerikaners nie. Lien vertel dat sy in die middae werk en tussendeur matriek moet probeer deurkom.

As Lien by die klaskamer uitstap, is sy onseker oor haar gevoelens. Sy voel blootgestel by die besef dat iemand anders dieper gekyk het en iets in haar ontdek het wat sy tot nou toe vir haarself gehou het. Sy voel kwaad dat juffrou Breytenbach so in haar 'bubble' ingeklim het en haar gedrag probeer analiseer. Tydens die Wiskunde-les besef Lien hoe woedend sy vir juffrou Breytenbach is. Sy kan glad nie op haar werk fokus nie, en as sy na skool saam met Wouter stap, vertel sy hom dat sy so kwaad is dat sy moord kan pleeg. Wouter luister geduldig na Lien se tirade. Hy dink Lien het oorreageer en dat juffrou Breytenbach dit goed bedoel het. Lien is kwaad dat hy haar nie ondersteun nie en as sy vinnig wegstap, beland sy amper voor 'n aankomende motor. Sy dink Wouter het haar verwerp en in die rug gesteek.

As Lien by die woonstel kom, lê Braam soos gewoonlik voor die televisie; dit irriteer Lien intens. Haar ma het daardie oggend gekla van maagprobleme en gesê dat sy nie werk toe gaan nie. Sy is egter nie by die woonstel nie en Braam weet ook nie waar sy is nie. Lien is bang dat haar ma haar werk by die Departement van Binnelandse Sake gaan verloor omdat sy so dikwels afwesig is. Lien maak vir haar en Braam sop warm en vra dat hy die soppot moet was en vir tannie Bets moet terugneem, maar hy weier volstrek en sê dat Lien dit self kan doen. Hy het geen simpatie met die feit dat Lien by Malie Dry se 'Garden of Evil' moet gaan werk om vir hulle kos te kan koop nie.

Bespreking – enkele belangrike aspekte in hierdie hoofstuk

Lien probeer ongesiens deur haar matriekjaar kom. Sy doen slegs wat van haar verwag word en wil nie by enigiets betrokke raak nie. Juffrou Breytenbach weet egter dat Lien tot baie meer in staat is: sy is 'n slim en talentvolle dogter en juffrou Breytenbach wil sien dat sy haar vermoëns benut. Sy dink Lien is onregverdig om haar opgekropte woede op almal om haar in die skool uit te haal. Sy bied aan om Lien te help, of anders moet Lien hulp gaan soek.
Lien is verward en geskok as sy besef dat juffrou Breytenbach daarvan bewus is dat sy probleme het. Sy het gemengde gevoelens hieroor – aanvanklik is sy beïndruk deur juffrou Breytenbach se skerp waarneming. Sy vervies haar egter dat die onderwyseres haar privaatheid wil binnedring. Teen die einde van die skooldag is sy woedend vir juffrou Breytenbach. As sy vir Wouter daarvan vertel en nie die verwagte steun en simpatie kry nie, word sy ook vir Wouter kwaad en storm alleen huis toe.

By die woonstel vind sy haar broer voor die televisie. Haar ma is nie tuis nie, maar Lien weet sy het nie gaan werk nie; sy is bekommerd dat haar ma haar werk gaan verloor. Sy vervies haar vir Braam se slapgathouding en gebrek aan samewerking, terwyl sy moet probeer om hulle almal se lewens bymekaar te hou.

LIEN SE LANKSTAANSKOENE OPSOMMINGS HOOFSTUK 4-6

LIEN SE LANKSTAANSKOENE OPSOMMING HOOFSTUK 5

5.  LIENTJIE LIEFLIK

Inhoud

Die koffiekroeg is baie stiller as die vorige dag. Malie is in die kombuis besig om met een van die werkers te raas wat 'n sny koek te groot gesny het. Dan storm sy by Lien verby sonder om haar raak te sien. Lien besluit om uit Moeilike Malie se pad te bly en doen haar werk sonder enige insident. Teen halfvyf bereken sy dat sy ongeveer R15 se fooitjies verdien het. Sy is moedeloos en wens Wouter was daar om haar te ondersteun.

As Lien met 'n skinkbord vol leë koppies en bordjies kombuis toe gaan, bots sy teen Agnes wat op daardie oomblik deur die swaaideur uitkom. Koek en breekgoed spat in alle rigtings. Klante draai in hul rigting om die petalje te aanskou. Agnes besef dat hulle in groot moeilikheid by Malie is. Malie behou haar glimlag teenoor die klant wat sy besig is om te bedien, maar Lien besef dis net toneelspeel. Malie ignoreer die insident tot nadat sy die geld in die kasregister getel het, dan stap sy kombuis toe en vra dat die twee kelnerinne haar moet volg.

In die kombuis gaan krap Malie tussen die gebreekte goed in die asblik en maak dan somme op haar optelmasjientjie. Volgens haar beloop die skade R128.50, en die twee meisies sal 'n paar dae lank sonder betaling moet werk om vir die skade te vergoed. Agnes aanvaar dit gelate, maar Lien objekteer en sê dat dit 'n ongeluk was. Malie vervies haar en sê dat Lien met so 'n houding nie die volgende dag hoef terug te kom nie. Lien dink aan die kos wat sy met die geld wou koop en hoe sy geld wil spaar om eendag oorsee te gaan. Alles lyk skielik so onmoontlik.

As Lien by die huis kom, is haar ma se kamerdeur toe. Dit beteken haar ma het dronk tuisgekom en slaap dit nou af. Sy wonder waar haar ma na werk gaan drink, want sy drink tog sekerlik nie by die werk nie. Sy besluit om tannie Bets se soppot terug te neem. Sy voel baie sleg oor die werk by Malie Dry wat nie uitgewerk het nie, want dit was tannie Bets wat vir haar die werk gekry het.

Die voordeurklokkie lui en as Lien oopmaak, is dit hulle jong predikant in byderwetse klere en met 'n opstaankuif. Hy was nog net een keer tevore by hulle en wil weet hoe dit gaan. Braam spring vinnig regop waar hy voor die televisie lê as hy die predikant sien. Hulle begin oor rugby gesels en Lien gaan koffie maak. In die kombuis kyk sy na die prent wat Braam van hulle gesin en hulle straat geteken het toe hy vyf jaar oud was. Braam het 'n prys daarvoor gewen. Lien besef hoe hulle lewens sedert daardie tyd verander het. Sy wonder wat die predikant sal dink as hy haar ma nou in haar beskonke toestand moet sien.

Lien is verwonderd oor die selfvertroue waarmee Braam met die predikant gesels. Sy voel oorbodig, want hulle gesels steeds oor rugby. Later vra Kuifie haar uit oor die skool en sy antwoord kortaf. Voordat hy vertrek, nooi hy Lien en Braam om die volgende Sondag se jeugdiens by te woon. Hy sê ook dat hy bereid is om te help as hulle enige probleme het. As die predikant weg is, besef Lien dat sy hom baie sleg behandel het. Sy kyk na haarself as die klein dogtertjie op Braam se prent en wonder wanneer sy in die aaklige mens ontaard het wat sy op die oomblik is.

As Lien met die soppot by tannie Bets aankom, is tannie Bets baie bly om Lien te sien. Sy dring aan dat Lien moet bly vir koffie en swartwoudkoek. Tannie Bets is op 'n streng dieet, maar sy bederf haarself soms met lekkernye. Alhoewel die woonstel dieselfde as Lien-hulle s'n is, lyk dit baie geselliger. Tannie Bets is baie lief vir countrymusiek en dit pas by haar vrolike woonstel.

Lien vertel vir tannie Bets dat haar werk by die koffiekroeg nie uitgewerk het nie. Tannie Bets is nie kwaad nie, want sy weet dat Malie Dry 'n moeilike vrou is. Sy stel voor dat Lien met Dirkie en Donovan gaan praat, want hulle soek dringend na 'n assistent om in die middae in hul haarkappersalon te kom help. Dirkie woon in dieselfde woonstelblok as Lien en tannie Bets.

Na 'n lekker kuiertjie en 'n tweede stuk swartwoudkoek gaan klop Lien aan Dirkie se deur. Sy ken Dirkie net van sien en hy lyk nie baie vriendelik wanneer hy die deur oopmaak nie. Wanneer sy sê dat sy belangstel om vir hulle te kom werk, kyk Dirkie krities na Lien se hare en hy wil weet of sy enige ervaring met hare het. Hy sê dat die werk net tydelik is totdat hul assistent van kraamverlof terugkeer. Hy vra Lien se telefoonnommer en sê hy sal haar laat weet, aangesien iemand anders ook in die werk belangstel. Hulle sal Lien R15 per uur betaal en sy mag haar hare gratis laat sny.

As Lien weer in die woonstel kom, is haar ma se deur steeds toe. Braam lê en fliek kyk. As Lien in die bad lê, besef sy dat Wouter besig is om deel van Jakaranda Hoërskool te word en sy nie. 'Wouter is nou een van húlle. Hy het tuis geraak. Sy het haar brother in arms verloor.' Sy gaan die volgende oggend vroeër as gewoonlik skool toe, want sy is kwaad vir Wouter en wil nie saam met hom skool toe stap nie.

Bespreking – enkele belangrike aspekte in hierdie hoofstuk

Hierdie hoofstuk is vol teleurstellings vir Lien. 'n Groot skok en teleurstelling wag op haar wanneer sy haar werk by Malie Dry verloor. Sy móét 'n deeltydse werk hê, want haar ma kan nie vir haar en Braam sorg nie en haar droom is om oorsee te gaan as sy klaar is met skool. Braam is nie bereid om Lien enigsins te help nie en sy besef sy is op haarself aangewese om hulle aan die gang te hou. Gelukkig is daar die moontlikheid van 'n deeltydse werk by Dirkie en Donovan se haarsalon, maar dit sal net tydelike verligting bring.

Die predikant daag op en kan sien dat Lien-hulle sukkel. Hy bied hulp aan, maar Lien is nie bereid om openhartig te wees oor hulle probleme nie. Hy en Braam gesels lekker, maar Lien is geïrriteerd en terughoudend. As Lien later in die bad lê, voel sy eensaam en verbitterd omdat sy dink dat selfs haar beste vriend, Wouter, sy rug op haar gedraai het. Hy het ingeburger geraak by hulle nuwe skool en is nie meer haar 'brother in arms' nie.