ASPOESTERTJIE EN DIE DRIE BERE – Nelia Engelbrecht

ASPOESTERTJIE EN DIE DRIE BERE – Nelia Engelbrecht

KORTVRAE 

1.	'Vanoggend – toe Triz bel om te sê daar's sowaar drie van hulle ...'
1.1	Wie/wat is die 'drie'? (1)
1.2	Hoekom was Triz die eerste om die drie te sien? (1)
2.	Vanessa wil ook sien hoe die seuns lyk. Waarom beskou sy Triz as baie gelukkig? (1)
3.	Waarom voel Corli dat Vanessa nie eintlik rede het om oor haar situasie te kla nie? Noem drie redes. (3)
4.	Triz sê dat 'n mens sjokolade op die drie broers se maagspiere sal kan rasper. Waarom gebruik sy waarskynlik hierdie vergelyking? (2)
5.	Vanessa is seker die broers oefen elke dag. Hoe weet ons dat sy baie fiksheids­bewus is? (1)
6.	Waarom vra die meisies vir Rosy – Triz-hulle se huishulp – wat die seuns se name is? (1)
7.	Waarom weet sy ook alles van Corli en haar twee vriendinne af? (1)
8.	'Die res van die vakansie lyk al hoe meer belowend'. Wat bedoel Corli met hierdie woorde? (1)
9.	Elkeen van die meisies dink aan 'n verskoning om hulleself aan die broers te gaan voorstel.
9.1	Watter verskoning wil Corli gebruik? Sê ook kortliks hoekom sy dié verskoning wil gebruik. (2)
9.2	Waarom is die bikini baie waardevol vir Corli? (1)
10.	Corli en Vanessa begin stry oor die bikini. Hoe ontlont Triz die spanning tussen die meisies? (1)
11.	Flankeer is skynbaar Corli se spesialiteit. Hoekom glo sy egter nie aan 'n ernstige verhouding nie? (2)
12.	Hoe gebeur dit dat Corli bo-op die seun op die sonstoel beland? (2)
13.	Terwyl sy bo-op hom lê – kan Corli nie ophou om in die seun se oë te staar nie. Hoekom? (1)
14.	Watter grappie maak Corli om haarself uit die verleentheid te probeer kry? (1)
15.	Corli het op Gareth beland – maar wat van die res ...
15.1	Waarin is Grant duidelik baie geïnteresseerd? (1)
15.2	Wat is al waarin Graham belangstel – en hoe weet ons dit? (2)
16.	Gareth vra of Corli langs hulle woon. Vanessa se mond hang oop wanneer Corli vir Gareth antwoord. Hoekom? (1)
17.	Gareth vertel vir Corli dat sy ma hulle maklik uitmekaar ken – al lyk hulle dieselfde. Volgens hom is hy die mooiste een. Wat sê Graham dan van Gareth waarmee Corli saamstem? (1)
18.	Die meisies kuier omtrent 'n uur lank saam met die drie broers. Tot watter gevolg-trekking kom Corli in hierdie tyd oor elkeen van die broers? (3)
19.	Wat besluit Corli die volgende dag om te doen wanneer sy van Triz-hulle se balkon af sien dat daar geen teken van die De Beer-broers is nie? (1)
20.	In die aantrekkamertjie sien Corli dat hulle dit lekker ingerig het -
20.1	Noem twee dinge wat die kamertjie baie gerieflik maak. (2)
20.2	Waar vind Corli haar bikini? (1)
21.	Waarom is sy so bly om haar bikini terug te kry? (2)
22.	Corli is nogal voorbarig as sy in die aantrekkamertjie kom. Wat doen sy wat sy eintlik nie behoort te doen nie? (2)
23.	Corli skrik wakker wanneer sy hoor hoe een van die broers haar met Gouelokkies vergelyk. Watter ooreenkomste is daar tussen haar en Gouelokkies? (3)
24.	Hoekom nooi Gareth vir Corli om saam met hom te gaan swem? (1)
25.	Alhoewel Gareth eers voorgee dat hy Grant is – besef Corli na 'n rukkie dat dit wel Gareth is. Hoe besef sy dit? (1)
26.	Watter besluit neem Corli na hierdie insident met Gareth? (1)
27.	Gareth hou daarvan om T-hemde met slagspreuke te dra. Hoe kan 'n mens aan die slagspreuke sien dat hy nogal 'n hoë dunk van homself het? (2)
28.	Wat beteken dit as Corli haar ma se motor as 'saam met Noag uit die ark' beskryf? (1)
29.	Corli-hulle sukkel finansieel. Hoe probeer haar ma om die gesin te onderhou? (2)
30.	Corli se ma laai haar by die restaurant af. Wat stel Corli voor sal sy doen omdat haar ma se motor skynbaar probleme gee – en wat antwoord haar ma? (2)
31.	Die restaurant ontvang daardie aand besoekers wat Corli nie verwag het nie –
31.1	Hoe beskryf sy Kristen – wat aandui dat sy nie van haar hou nie? (1)
31.2	Corli sien dan vir Gareth. Watter effek het hy op haar? (1)
32.	Waar en wanneer het Gareth en Kristen mekaar ontmoet? (1)
33.	Verduidelik kortliks waarom Corli vir Kristen as haar grootste vyand beskryf. (2)
34.1	Noem drie dinge waaroor Kristen kla – waarskynlik om Corli terug te kry vir die kougom-episode. (3)
34.2	Waarmee dreig sy as Corli nie gaan doen wat sy vra nie? (1)
34.3	Corli besluit om eerder te doen wat Kristen haar beveel. Hoekom? (1)
34.4	Wat sê Kristen vir Gareth wat Corli waarskynlik baie seermaak? (2)
35.	Corli beland op die vloer en die breekgoed val in stukke op die grond –
35.1	Wat wil Gareth dadelik weet? (1)
35.2	Waarom sê die bestuurder dat sy nie verder sal kan werk nie? (1)
35.3	Gareth bied aan om vir Corli hospitaal toe te neem. Hoe sal Kristen by die huis kom? (1)
36.	Corli vra vir Gareth om haar eerder direk huis toe te neem –
36.1	Wat erken sy teenoor hom terwyl hulle op pad is? (1)
36.2	Waarom is dit nie vir hom 'n verrassing nie? (1)
37.	Gareth vertel dan vir Corli iets wat haar woedend maak. Wat vertel hy? (1)
38.	Gareth vertel haar dan dat hy al die hele week aan haar dink – en hy noem haar weer Gouelokkies. Hoe reageer Corli hierop? (2)
39.	Hoe word haar feëverhaal egter uiteindelik bewaarheid? (2)
40.	Hierdie verhaal is 'n moderne feëverhaal wat op klassieke feëverhale gebaseer is –
40.1	Watter optrede van Corli herinner sterk aan hoe Gouelokkies opgetree het? Sê kortliks. (2)
40.2	Die drieling Grant – Graham en Gareth is die Drie Bere in die Gouelokkies-verhaal. Hoekom – dink jy – word hulle die 'drie bere' in die titel genoem? (1)
40.3	Verduidelik kortliks hoekom Corli haarself met Aspoestertjie vergelyk. (3)